No bi Vollmond trifft sich e bunte Huffe
im Schälloch, aber dissmol nid zem Suffe
sie kämpfe sich au nid dur d’Näbelschwade
zum schpöter in dr Birs go z’bade
bim Michael het’s zwor mänggmol so ussgseh
hesch als nur no dr Hals und d’Kappe gseh
nei, s’Ziel vo däm Herbscht-Schpaziergang
isch klar dr dissjährigi Laichfischfang.
Fötele mit Gummihändsche, das kasch jo vergässe
ohni, sottsch aber au keini Bäch durchmässe
Wenn ussrutschisch riskiersch e Duurwälle uff em Kopf
ou nei, do wärsch en arme Tropf!
Das Schauschpiel sehsch jo au vom Ufer uss
So vermydisch jeglige Verdruss.
Was die Schpezialischte in däm Bach vollfüehre
könnt e-n-empfindligi Seel zu Träne rüehre
aber die Fischli luege scho gly
wieder verhältnimässig zfriede dry.
als Bock wirsch sortiert, nach schteril oder potänt
so weisch grad Bscheid über di Erotik-Talänt
bi de Wyber zellt e pralle Ranze
e Garantie zem dur d’ Abschtreifig z‘tanze.
Au punggto Fachwüsse hesch mänggi Erlüchtig
isch jo nid so, dassi das gar nid brüchti
aber s‘ Highlight vo däm Gross-Event
wo dr Schwarzbueb Laichfischfang nennt
isch die nobelprysverdächtigi Navigation
vo de Bsatzige, das isch kei Hohn
jedi Hochsee-Crew wurdi vor Nyd erblasse
und dr sofortigi Ruggtritt verfasse
nei, ächt, i ha jo scho einiges gseh
aber das isch hochi Kunscht per se!
Danggschön, Michi, dassi das ha dörfe begleite
sorry, für dini Ängscht, ich könnti ussgleite
ohni Händsche, ohni Schtand
mänggmol fahri mi Verschtand an d’Wand
aber will Läbe eh läbensgföhrlig isch
machi jetzt unter dä Bricht e Schtrich!
Salli zämme!
Skandalreporter Hampe
Kulinarischi, sowie Kunscht-Erläbnis ghöre au dr’zue!
Die sälteni Krüzig zwische-n-ere Schwarzbuebe-Forälle und eme Stör ussem Schwarze Meer